Kraftaverk þegar drengjum var bjargað - Felix í fréttum RÚV
„Maður fær enn þá gæsahúð þegar maður sá að þeir vöknuðu. Það var bara ótrúleg stund,“ segir Felix Valsson, sérfræðilæknir í svæfingu og gjörgæslu á Landspítala, í viðtalið við Þórhildi Þorkelsdóttur fréttamann í fréttum sjónvarpsins. Felix tók á móti drengjunum tveimur sem urðu eftir í bílnum sem fór í Hafnarfjarðarhöfn föstudagskvöldið 17. janúar. Kafarar náðu þeim úr höfninni á um hálftíma.
„Þeir voru ekki með neinn hjartslátt. Sjúkraflutningsmenn og læknar á spítalanum voru að skiptast á að hnoða þá og reyna að halda blóðrás til hjartans og heilans. Og þetta leit mjög illa út í raun og veru,“ segir Felix. Mál piltanna sé einstakt á alla mælikvarða. Þetta séu fyrstu tilfellin, þótt víðar sé leitað, þar sem drengir í hjartastoppi allan tímann fara beint í hjarta- og lungnavél.
„Það er ekkert ofsögum sagt að segja að þetta sé hálfgert kraftaverk. Nei, ég hugsa að það sé alveg óhætt að kalla þetta kraftaverk. Það er ekkert minna.“