Segir hagsmuni sjúklinga borna fyrir borð

Stjórn Læknafélags Íslands lýsir í ályktun þungum áhyggjum af stöðu sérhæfðrar heilbrigðisþjónustu utan sjúkrahúsa. Stjórnin segir að ákvörðun velferðarráðuneytisins og Sjúkratrygginga Íslands um að hafna umsóknum sérfræðilækna að rammasamningi sérfræðilækna megi að öllum líkindum jafna við brot á grundvallarmannréttindum landsmanna um aðgengi að heilbrigðisþjónustu óháð efnahag.

Stjórn Læknafélags Íslands segir að hagsmunir ákveðinna hópa sjúkratryggðra séu fyrir borð bornir þegar stjórnvöld neiti að hleypa fleiri sérfræðilækningum að rammasamningnum. Þetta sé gert á sama tíma og aðrir innan heilbrigðiskerfisins séu ekki í stakk búnir til að taka við og veita þessa þjónustu. Afleiðingar þessa séu að læknum í ýmsum sérgreinum hafi fækkað og það geti leitt til skorts á sérhæfðri þjónustu við langveika sjúklinga, töf á greiningum alvarlegra sjúkdóma, óviðunandi eftirfylgni á meðferð og skort á meðferðarúrræðum. „Þetta er skerðing sem bitnar fyrst og fremst á sjúklingum og öryggi þeirra en einnig á atvinnufrelsi lækna. Slíkar aðgerðir hafa ákveðinn fælingarmátt og letja íslenska lækna frá því að koma til Íslands að afloknu löngu sérfræðinámi, sem aftur bíður heim hættu á stöðnun í heilbrigðisþjónustunni,“ segir í ályktuninni.

 

Sjá frétt á ruv.is